Վահան Հովհաննիսյան

Նախընտրական կամպանիայի ժամանակ` ամիսներ առաջ, իշխանության թեկնածուն աշխատում էր ամեն տեղ մենակ երեւալ. Որովհետեւ իր ընկերները ցույց տալու բան չեն: Այսինքն` այդ մարդկանցով գնալ ընտրության, հաղթել կարելի է միայն խարդախության ճանապարհով. այսօր, քարոզարշավի ամփոփիչ հանրահավաքի ժամանակ հայտարարեց ՀՅԴ Բյուրոյի անդամ, ԱԺ ՀՅԴ խմբակցության պատգամավոր Վահան Հովհաննեսյանը:

Նա նշեց, որ այսօր էլ բոլորը տեսնում են իշխող կուսակցության քարոզարշավը, երբ ՀՀԿ ցուցկաի առաջին համարը դարձյալ աշխատում է ցույց չտալ այն կերպարներին, որոնք կազմում են իր թիմը: Իսկ այդ առումով, շեշտեց Վահան հովհաննեյանը, ՀՅԴ-ն այնքան հանգիստ է, քանի որ եթե որեւէ մեկը կարդա իրենց ցուցակի ազգանունները, կտեսնի, որ բոլորն էլ նույն տեսակի մարդիկ են` կարգին, պարկեշտ, ոչ իրենց անունը, ոչ իրենց կուսակցության անունը, ոչ էլ Երեւանը երբեք չխայտառակած մարդիկ:

Վահան Հովհաննսիյանը, դիմելով երեւանցիներին, ասաց, որ միայն դաշնակցական քաղաքապետը կարող է Երեւանը դարձնել կարգին կառավարվող, մաքուր քաղաք, որը կմաքրի իր շուրջը գտնվող մարզերն ու ամբողջ երկիրը, եւ մենք կունենանք ազատ Հայաստան:

«Ազատ Հայաստանը սկսվում է ձեր ազատ քվեարկությունից: Ոչ ոք չի կարող ձեզ կաշկանդել. քանի անգամ գնացել եք ընտրության ու համոզվել եք, որ ոչ ոք իրականում, ոչ ինչ-որ վերահսկողություն կարող է ձեզ վրա իրակաանացնել, ոչ էլ ճնշում գործադրել: Ամեն ինչը սպառնալիք է` հին հեքիաթի պես, երբ աղվեսն, անընդհատ վախեցնելով, պահանջում է ճտերին ներքեւ գցել: Լավ` քանի՞ ճուտ ունեք դուք` Հայաստանի սահմաններից դուրս գցելու, քանի՞ ճուտ ունեք, որ դեռ արտագաղթեն: վերջացնել է պետք` ինչքա՞ն կարելի է այսպես:

Սիրելի երեւանցիներ, մենք խաղում ենք մեր երկրի ճակատագրի հետ ու կատակ ենք անում այդ ճակատագրի հետ ինչ-որ 10-15 հազար դրամով. ինչ-որ մի ժեկի պետի մակարդակի մարդու ժպիտով մեզ վրա նայելը դարձնում ենք մեզ համար ճակատագրական: Կա՛մ մենք գնում ու քվեարկում ենք ՀՅԴ-ի օգտին, կա՛մ գնում ու ապահովում ենք ընդդիմադիր կուսակցությունների մեծամասնություն քաղաքապետարանում, կամ հետո պետք չի լաց լինել` նայելով ճամպրուկներին»,- նշեց Վահան Հովհաննեսյանը:

Նա շեշտեց, որ ՀՅԴ-ն ամենաճշգրիտ կերպով է ընտրել թիրախը, որովհետեւ Երեւանից սկսել հեղափոխությունը, բարեփոխումները, ամենաանվնաս, ամենահանգիստ եւ զուսպ ձեւն է, որը երբեք չի կարող պրոբլեմներ առաջացնել, որով հենց ՀՅԴ-ականներին հաճախ կաշկանդել են:

«Դաշնակցականներին միշտ կաշկանդել են այս կամ այն արտաքին սպառնալիքներով, իսկ Երեւանում այդպիսի սպառնալիք չկան, եւ ոչ ոք չի կարող մեզ կաշկանդել այս կամ այն սպառնալիքը մեջտեղ բերելով: Ամենամեծ սպառնալիքը Հանրապետական կուսակցության իշխանությունը Երեւանում շարունակելն է` դրանից մեծ սպառնալիք այս պահին չկա: Եվ միայն դուք կարող եք դա կանգնեցնել` այն թիմով, որը չի ամաչում ձեր առջեւ ներկայանալ` ամբողջ կազմով»,- հայտարարեց ՀՅԴ Բյուրոյի անդամը:

Վահան Հովհաննեսյանը ասաց, որ ՀՅԴ-ն կբերի մարդկյանց, ովքեր պատասխան կտան, ոչ թե շեֆի ու «թագավոր աղբոր» առջեւ, այլ իրենց պաշտոնի ու ժողովրդի:

http://www.yerkir.am/am/news/49837.htm

Հարցազրույց Ազգային ժողովի ՀՅԴ խմբակցության պատգամավոր Վահան հովհաննիսյանի հետ:

-Նախընտրական քարոզարշավն ավարտվեց. կարողացա՞ն ոչ իշխանական ուժերը համոզել ընտրողին, որ մայիսի 5-ի ընտրությունը ունի քաղաքական նշանակություն և դրա միջոցով հնարավոր է իշխանություն փոխել:

-Որ իշխանությունը պետք է փոխվի, հասարակությունը վաղուց էր զգում: Պետք էր ուղղակի ապացուցել, որ դա հնարավոր է անել այս ընտրությունների միջոցով, քանի որ դրանք համայնքային են առերևույթ, մինչդեռ իրականում ունեն լուրջ քաղաքական հիմք: Մենք արեցինք առավելագույնը, արեցինք ամեն ինչ: Կողքից դիտելով` մյուս կուսակցություններն էլ էին փորձում դա անել: Իհարկե, ցանկալի կլիներ, որ դա արվեր միասնաբար, բայց այսօր նույնիսկ ՀՀԿ-ի որոշ շրջանակներ այլևս չեն հերքում այս ընտրությունների քաղաքական իմաստը:

-Գուցե նրանք ուղղակի ավելո՞րդ են համարում այդ մասին խոսելը, որովհետև համոզված են դրանց համայնքային նշանակության մեջ:

-Ոչ, ոմանք փորձում են ապացուցել, որ երևանցիները իրենք, զգալի մեծամասնությամբ, ցանկանում են, որ սա քաղաքական ընտրություն չլինի: Բայց այս նույն մեծամասնությունը ժամանակին քվեարկում էր այս ընտրությունները քաղաքական դարձնելու համար, որովհետև 100% համամասնական ընտրակարգով ընտրությունը չի կարող քաղաքական չլինել, ու երբ փորձում են տանել միայն տնտեսավարության դաշտ, սա պարզ խաբեություն է, որովհետև ճիշտ քաղաքային կառավարում կարող է իրականացվել ճիշտ քաղաքականության դեպքում:

-Ձեր կարծիքով` քարոզարշավն ազդո՞ւմ է ընտրությունների արդյունքների վրա:

-Քարոզարշավից բացի, իհարկե, կան այլ մեխանիզմներ, որոնք կարող են ազդեցություն ունենալ ընտրությունների վրա, բայց կա քարոզարշավին զուգահեռ ուրիշ օրինական միջոց. մնացածը օրենքից դուրս են: Դրանք չեն էլ կարող մեր կողմից կիրառվել, բայց դեմն առնել, որ մյուսների կողմից էլ չկիրառվի, մենք կարող ենք:

-Ինչպե՞ս:

-Հանձնաժողովներում վերահսկողություն իրականացնելով:

-Այս հարցի շուրջ կա՞ պայմանավորվածություն ոչ իշխանական մյուս ուժերի հետ:

-Ես մեր շտաբի անդամ չեմ, բայց կարծում եմ, որ կա համաձայնություն, առնվազն շտաբերի մակարդակով, թույլ չտալ, որ խախտումներ լինեն: Հիմա այդ համագործակցության տեխնիկական ու տակտիկական կողմերն են քննարկվում:

-Հանդիպումներից մեկի ժամանակ ասացիք, թե ոչ իշխանական ուժերը պետք է հայտարարեն հետընտրական դաշինք կազմելու մասին: Սա նշանակո՞ւմ է, որ առանց այդ հայտարարության` չեք վստահում ոչ իշխանական ուժերին:

-Մենք ուզում ենք, որ այն, ինչ չհաջողվեց մինչև ընտրություններ, հաջողվի գոնե ընտրություններից հետո: Հիմա, քանի դեռ այդպիսի հայտարարություն չի հնչել, որտեղի՞ց վստահություն լինի: Ես կարող եմ ենթադրել, թե ինչու դա չի արվում. որոշ ուժեր, թերևս, մտածում են` ինչու հիմա ընդդիմադիր ճամբարի հետ համաձայնություններով մեզ կաշկանդենք, գուցե հետո կարողանանք համաձայնվել իշխանական ուժի հետ ու նրա համար 41 % ապահովենք, իհարկե, վարձատրվելու ակնկալիքով:

-Քարոզարշավի սկզբում Վարդան Օսկանյանը խոսեց ընդդիմադիր դառնալու անհրաժեշտության մասին. սա իրատեսակա՞ն եք համարում :

-Անհրաժեշտության մասին խոսելը մի բան է, կդառնա թե ոչ` այլ բան: Կան ուժեր, որոնք չեն ամաչում ասել, որ ընդդիմություն են, և կա այս պահին խորհրդարանում մեծությամբ երկրորդ տեղը զբաղեցնող քաղաքական ուժ, որը իր ընդդիմադիր լինելու մասին դեռ չի հայտարարել: Հիմա Վարդան Օսկանյանին ես հասկանում եմ: Նման հայտարարություն անելը տրամաբանական է, բայց կա նաև գեղեցիկ բառեր, ինչպիսին այլընտրանքն է, արտասանելու ցանկություն: Դաշնակցությունը ինքը գիտակցում է այլընտրանքի կարևորությունը, ու այդ այլընտրանքը պետք է լինի ամենուր` այլընտրանք ոչ միայն իշխանությանը, այլև ընդդիմադիր ուժերին: Եթե այլընտրանք չկա, կապ չունի, թե որ դաշտում, արդեն վատ է: Հիմա, օրինակ, այլընտրանք չկա, որովհետև Հանրապետականը զբաղեցրել է բոլոր պաշտոնները՝ ժեկի պետից մինչեւ նախագահ , ու քանի որ մրցակցության մեջ չէ ոչ մի ուժի հետ, լճանում է ու դառնում ճահիճ: Այս առումով ես կողմ եմ այլընտրանքին. դա պետք է լինի, որ մրցակցություն ապահովվի: Մինչդեռ քաղաքական ուժը պետք է հայտարարի, թե որ դաշտում է:

-Կարծու՞մ եք` ԲՀԿ-ի կողմնորոշման համար կարող են որոշիչ լինել ավագանու ընտրությունների արդյունքները:

-Այո, կարող է: Կուսակցությունը պետք է իր կատարած քայլերի համար որոշ տրամաբանական շարունակություն նախատեսի: Այս ընտրությունը վաղը կավարտվի, մի քանի տարի կա մինչև հաջորդ խորհրդարանական, նախագահական և ավագանու ընտրություններ, այս մի քանի տարվա ընթացքում ինչո՞վ է զբաղվելու կուսակցությունը: Ոչ միայն ԲՀԿ-ն պետք է այս հարցը տա իրեն, այլ բոլոր մյուս ոչ իշխանական ուժերը: Ի վերջո, լինել ընդդիմադիր, չի նշանակում քննադատաբար վերաբերվել իշխանություններին միայն նախընտրական շրջանում:

-Նախորդ ավագանու ընտրություններում ՀՅԴ-ն պարտվեց, խորհրդարանական ընտրություններում 10 տեղ կորցրեց, նախագահականին չմասնակցեց. այսքանից հետո ի՞նչ նշանակություն ունեն ավագանու ընտրությունները Դաշնակցության համար:

-Հիմա մենք իշխանափոխության հնարավորություն ենք տեսնում: ժողովուրդը պիտի հասկանա այս ընտրության լրջությունը: Ինչո՞ւ են ձախողվում համապետական ընտրություններին հաջորդող բողոքի ակցիաները. որովհետեւ մենք այնպիսի ռազմաստրատեգիական իրավիճակում ենք, որ համապետական ընտրություններին հաջորդող ցնցումը կարող է վտանգավոր լինել երկրի համար. Ես նկատի ունեմ արտաքին վտանգներն ու ազդեցությունը: Որքան մեծ է ընտրության համապետական կարևորությունը, այդքան մեծ է նման ցնցումների վտանգը: Քաղաքային ընտրությունների ժամանակ կա շանս վերցնել Հայաստանի կեսը` չառաջացնելով նման ցնցումներ: Ի միջիայլոց, Սաակաշվիլին Թբիլիսիի քաղաքապետն էր, և ինչքան ուզում են ասեն, թե փողկապ էր ծամում, նա նոր որակներ բերեց իր երկրում:

-Ըստ սոցիոլոգիական հարցումների` ՀՅԴ-ին չի հաջողվելու հաղթահարել օրենքով սահմանված 6%-ի շեմը: Սա Ձեզ չի՞ մտահոգում:

-Նախ ասեմ, որ այդ «հարցումներ» ասվածը ամբողջությամբ վարկաբեկված է Հայաստանում: Ժողովուրդը, ընդհանրապես, չի հավատում ընտրություններին արդյունքներին, հետևաբար, չի հավատում նաև հարցումներին: Ինչ վերաբերում է նրան, թե ՀՅԴ-ն չի հաղթահարելու 6%-ի շեմը. դե, եթե չհաղթահարի, թող չհաղթահարի: Ցանկացած կուսակցություն էլ պետք է պատրաստ լինի հաղթանակի, սա շատ կարեւոր է, որովհետև կան կուսակցություններ ու քաղաքական դեմքեր, որոնք պատրաստ չեն լինում հաղթանակի, որոնք կարող են հավաքել հսկայական քանակության ձայներ ու հետո լցնել ջուրը:

-Րաֆֆի Հովհաննիսյանի՞ն նկատի ունեք:

-Ես խոսում եմ, Դուք ում ուզում եք` նկատի ունեցեք: Ուզում եմ ասել, որ քաղաքական գործիչը և ուժը պետք է պատրաստ լինեն հաղթանակի, նաև պարտվելու: Մենք երկուսին էլ սովոր ենք, երկուսին էլ պատրաստ ենք:

-Գյումրիի դեպքերից հետո ոստիկանապետի հայտնի նախադասությանը ԱԺ ամբիոնից երկու պատգամավոր արձագանքեց` Դուք և Նիկոլ Փաշինյանը: Ձեր ասելիքը ուղղված էր «գողական» պատգամավորներին, մինչդեռ Փաշինյանը ոստիկանապետից պահանջում էր պատգամավորների հետ արա-ով չխոսել՞

-Ես կարծում եմ, որ կոնկրետ այն պատգամավորներին, ում նկատի է ունեցել ոստիկանապետը, նրանց ուրիշ ձեւով դիմել չի էլ կարելի: Ծայրահեղ դեպքում կարելի է ասել ապե, եթե ավելի ընկերական հարաբերությունների մեջ ես: Իրականում մենք գիտենք չէ, թե ովքեր են այդ մարդիկ. «արա», «ապե» կամ «ախպեր ջան» կատեգորիան Ազգային ժողովում բավական ստվար զանգված է կազմում: Ի վերջո, անունները շատ էլ կարեւոր չեն. ԱԺ-ի մուտքի մոտ ֆեյս-կոնտրոլ դնեն, բոլորին էլ կտեսնեն: Իմ ասելիքը այլ բան է. կան օրինապաշտ քաղաքացիներ, որոնք ենթարկվում են օրենքի ու գիտակցում են, որ իրենք օրենքի սուբյեկտ ու օբյեկտ են, և կա կրիմինալ աշխարհը, որը չի ենթարկվում օրենքին: Սրանց միջև պետությունը ստեղծում է բարիեր` իրավապահ մարմինների տեսքով: Բայց երբ ամեն բան խախտվում է, այդ մարմինները սկսում են ծառայել կրիմինալին` օրինապաշտ հասարակությանը պաշտպանելու փոխարեն: Ոստիկանապետի հայտարարոթյունը ցույց է տալիս, որ Հայաստանում ոստիկանությունը կարծես թե սկսում է պաշտպանել այս օրինապաշտ հասարակությանը կրիմինալից: Տարօրինակն այն է, որ նրանք, ովքեր օրինաստեղծ մարմնի անդամ են համարվում, նրանք են դիմում: Ովքեր փորձում են գողականով խոսել, իրականության մեջ դիմում են մենթին, ոստիկանին`թույլտվություն խնդրելով մնալ գողականի դաշտում: Այ սա վերջն է: Այսպես չպիտի լինի. մի’ խաղա, կամ եղիր գողական, կամ անցիր օրինական դաշտ: Այս առումով ոստիկանապետի ասածը ողջունելի է:

-Դուք ԱԺ էթիկայի հանձնաժողովի անդամ եք. հետևողակա՞ն եք լինելու «գողական» պատգամավորների հարցը այս հանձնաժողովում քննելու գործում:

-Ես հիմա որևէ գործողություն չեմ ձեռնարկի, որովհետև տեսել եմ, թե ինչպես են էթիկայի հանձնաժողովում շատ կարևոր հարցեր քննարկելիս մեծամասնությունն ու այլընտրանքը անհաղթահարելի մի բլոկ կազմում: Դրա համար ես հարցը մասնավորեցնելու պատճառ չեմ տեսնում, բայց խոսեցի այդ մասին ԱԺ ամբիոնից` տեղի ունեցածը նաև այս տեսանկյունից դիտարկելու համար: Կրակոց, ձերբակալություն. այս ամեն ինչը սովորական ոստիկանական առօրյայից են, բայց այս դեպքում տակը նաև փիլիսոփայություն կա:

-Քառօրյայի առաջին օրը Զարուհի Փոստանջյանը Հովիկ Աբրահամյանին կոչ արեց ցույցեր անել ու պահանջել ԱԺ օրակարգից հանել հայ-թուրքական արձանագրությունները: Երկրորդ օրը Դուք հորդորեցիք, որ ԱԺ նախագահը ոստիկանապետից ճշտի իրեն զանգող պատգամավորների անունները: Տպավորություն է, թե փորձ է արվում ԱԺ նախագահին ընդդիմադիր դաշտ բերել:

-Սխալ տպավորություն է. Ազգային ժողովի նախագահին հնարավոր չէ իր դաշտից հանել:

http://parliamentmonitoring.am

Ո՞ր պատգամավորներն են զանգահարել ոստիկանապետին ու խնդրել ցուցմունք չվերցնել Գյումրիի դեպքերի մեղավորներից: Այս հարցն այսօր խորհրդարանում հնչեցրել է Դաշնակցություն խմբակցությունից Վահան Հովհաննիսյանը` Հովիկ Աբրահամյանին առաջարկելով այդ պատգամավորների վարքը քննարկել Էթիկայի հանձնաժողովում:
“Ես ուզում եմ դիմել Ազգային ժողովի նախագահին: Եթե Ոստիկանապետից պարզենք, թե ովքե՞ր են այն պատգամավորները, ովքեր զանգել են իրեն, որ այդ մեղավորներից ցուցմունք տալ չպահանջեն: Այս խորհրդարանի “խառոշի տղերքն” ովքե՞ր են, ովքե՞ր կարող են որոշել, թե ո՞վ պետք է ցուցմունք տա, եւ ո՞վ` ոչ: Հարցը եկեք քննենք Էթիկայի հանձնաժողովում”,- առաջարկեց Վահան Հովհաննիսյանը։

Խայտառակություն է, եթե երեւանցիներին հասցրել են այն վիճակին, որ նրանք վախենում են ազատ շարժվել, դա վտանգավոր է. Կենտրոն համայնքում այսօր, ի պատասխան դիտարկմանը, թե բնակիչները վախենում են իջնել ոչ իշխանական քաղաքական ուժերի հետ հանդիպումների, քանի որ վախենում են, որ ցուցակագրողներնը իրենց անունները կներառեն «սեւ ցուցակներում», ասաց ՀՅԴ Բյուրոյի անդամ, ԱԺ ՀՅԴ խմբակցության պատգամավոր Վահան Հովհաննեսյանը:

Նա նշեց, որ դա մայրաքաղաքի բնակչի վերաբերմունք չէ, որովհետեւ մայրաքաղաքը միշտ առաջատարն է լինում, ցանկացած երկրում ու ցանկացած ժամանակ այդպես է եղել` մայրաքաղաքի բնակչությունն ամենակիրթն ու ամենաըմբոստն է լինում եւ չի վախենում:

Լրագրողների հարցին, թե Վահան Հովհաննեսյանը նույնպես ՀՅԴ-ի ամենահեղինակավոր եւ հարգանք վայելող գործիչներից է, ինչո՞ւ նրա անունը տեղ չի գտել Երեւանի ավագանու ՀՅԴ համամասնական ցուցակում, պատգամավորը պատասխանեց, որ ամեն մեկն իր ոլորտն ունի, որ ինքը Դաշնակցության Բյուրոյի անդամ է եւ, որպես Բյուրոյի անդամ, առնչվում է ավելի շատ միջազգային խնդիրներին` Արցախի ճանաչում, Ցեղասպանության հատուցման առաջ քաշում, եւ հնարավոր չէ հասցնել ամեն ինչ:

Իսկ դիտարկմանը, թե նախորդ ընտրություններում Արծվիկ Մինասյանն էր գլխավորում ՀՅԴ համամասնական ցուցակը, այս անգամ` Արմեն Ռուստամյանը, ո՞րն է տարբերությունը, Վահան Հովհաննեսյանը պատասխանեց, որ մեծ տարբերություն չկա, որովհետեւ ՀՅԴ-ն, ի տարբերություն մյուս կուսակցությունների, միշտ հանդես է գալիս որպես թիմ:

«Դաշնակցության մեջ չկա մի այնպիսի հասկացություն` ինչ-որ «թագավոր ախպեր» կամ «շեֆ ջան», մեր մեջ «շեֆ ջան» չկա, պարզապես շեֆ` առանց ջանի էլ չկա, ի տարբերություն այլ ուժերի: Մնացած բոլոր ուժերում կա»,- շեշտեց Վահան Հովհաննեսյանը:

http://www.yerkir.am/am/news/49557.htm

«Հայ Յեղափոխական Դաշնակցության» Բյուրոյի անդամ Վահան Հովհաննիսյանը որևէ փոքրամասնության հեգնելու, ճնշելու, ծեծելու կամ արգելելու կողմնակից չէ, բայց «Կոմայգու» հայտնի հարցի լուծում ակնկալում է, և այն ըստ նրա՝ պետք է լինի քաղաքակիրթ ձևերով:

Tert.am-ի հարցին, թե Երևանի ավագանու ընտրությունների քարոզարշավի ժամանակ կրկին ակտուալ դարձավ Կոմայգում գիշերային ժամերին հավաքվող սեռական փոքրամասնությունների հարցը, ու Դաշնակցությունն ինչպե՞ս է պատկերացնում հարցի լուծումը, Վահան Հովհաննիսյանն ասաց. «Ես այնտեղ գիշերային ժամերին չեմ գնում, ոչ մի անգամ չեմ հանդիպել: Մեր կուսակցությունը ոչ մի փոքրամասնության հեգնելու, ճնշելու, ծեծելու, արգելելու կողմնակից չէ, բայց Երևանը մաքուր պահելու բոլոր այն ազդեցություններից, որոնք կարող են վնաս տալ մատաղ սերնդին, էդ կարող եք վստահ լինել»:

Ըստ դաշնակցական պատգամավորի՝ հարցը լուծելու համար բոլորովին էլ պետք չէ բռնի գործողություններ անել, ծեծուջարդ կազմակերպել, ինչ-որ բան վառել կամ բար պայթեցնել:

«Կան քաղաքակիրթ ձևեր, և ես կարծում եմ, որ այն թրենդը՝ աշխարհում հիմա մոդա ընկած էդ քննարկումները միասեռամոլների ամուսնությունների մասին, թե իրենք իրավունք ունե՞ն երեխա որդեգրել, թե ոչ, այդ ամեն ինչը Հայաստանը կկարողանա սահուն շրջանցել, առնվազն տեսանելի ապագայում: Բայց պետք է ջղագրգիռ շարժումներ չանել»,- ավելացրեց Վահան Հովհաննիսյանը:

Հիշեցնենք, որ «Օրինաց երկիր» կուսակցության առաջին համար Արմեն Երիցյանը քարոզարշավի ընթացքում առաջարկել էր նկարել նրանց և գցել Youtube:

Վահան Հովհաննիսյանի կարծիքով՝ «կոնկրետ այդ այգին» Ոստիկանության գործն է:
«Եթե օրինակ՝ պոռնկությունն արգելված է երկրում, պոռնիկներին հավաքում են չէ՞ փողոցներից, և բոլոր տեսակին պետք է հավաքեն անկախ սեռից կամ ձգտումներից»,-ասաց նա:

http://tert.am/am/news/2013/04/30/sexual-minority/

Մարդիկ, ովքեր մինչեւ հիմա իշխանության գլուխ են Հայաստանում, ինչպես եկան իշխանության գլուխ կոմունիստներից հետո, այնպես էլ իշխանությունը չի փոխվել. այսօր Կենտրոնում Երեւանի բնակիչների հետ հանդիպման ժամանակ նշեց ՀՅԴ Բյուրոյի անդամ, ԱԺ ՀՅԴ խմբակցության պատգամավոր Վահան Հովհաննեսյանը:

Նա հորդորեց երեւանցիներին չխափվել կուսակցությունների անունների փոփոխությանը, որովհետեւ դեմքերը նույնն են, մոտեցումները նույնն են եւ ագահությունը եւս նույնն է:

«Այն ինչ մենք այսօր տեսնում ենք Երեւանում, պարզապես ագահության եւ քաղաքի քաղաքային մշակույթ չունենալու հետեւանք է: Որովհետեւ շուկայական քաղաքականությունը, ազատ տնտեսությունը երբեք ու երբեք չեն կարող ավելի վերադաս նպատակ լինել` նրանք ընդամենը ծառայում են, ընդամենը ենթակա են եւ պետք է ծառայեն` մարդկանց համար ստեղծելու նորմալ պայմաններ: Այնինչ մեր երկրում լիբերալ տնտեսությունը դարձել է մի արքա, մի թագավոր, որին ենթարկված է ամբողջ Հայաստանի բնակչությունը եւ երեւանցիները` հատկապես»,- ասաց Վահան Հովհաննեսյանը:

Նա իր ասածը պարզաբանեց, որ երեւանցիներից խլում են կանաչ տարածությունները, բակային տարածությունները, օդը, ազատ շարժվելու հնարավորությունը, եւ Երեւանը դադարում է լինել հաճելի մայրաքաղաք, այլ դառնում է պարզապես քաղաք, որտեղ մարդիկ պարզապես ապրում են, եւ գնալով սկսում են զգալ, որ ստիպված են ապրում: Վահան Հովհաննեսյանը շեշտեց, որ այս վիճակը հարկավոր է փոխել, եւ դա դժվար չէ անել:

Ու այն հարցին, թե ինչ կանի ՀՅԴ-ն, երբ Երեւանում ստանձնի իշխանությունը, մշեց Հովհաննեսյանը, պատասխանը շատ պարզ է` «նախեւառաջ ռաբիզներն ու անգրագետները կվռնդվեն երեւանյան իշխանության բոլոր մակարդակներից` թաղապետարան, քաղաքապետարան, վարչություններ, կանաչապատում, տրանսպորտ, աղբահանություն եւ այլն ու բոլոր տեղերում, որոնք դարձել են հարստանալու տեղ եւ դադարել են ծառայել երեւանցուն, այդ բոլոր տեղերում լուրջ լվացք է սպասվում»,- հայտարարեց բանախոսը:

Վահան Հովհաննեսյանն ասաց, որ այնտեղ, իհարկե, կան մարդիկ, ովքեր լավ մասնագետներ են, բայց աշխատում են այս կանոններով, որովհետեւ նրանց պարտադրում են այսպես աշխատել:

«Նայե’ք Ազգային Ժողովին` նույն բանն է, որովհետեւ այնտեղ էլ են մարդիկ գնացել ու իբր ընտրվել են Ձեր քվեներով, եւ այնտեղ են գնացել, որ ծառայեն ձեր շահերին` ծառայո՞ւմ են սակայն. բացարձակապե’ս, որովհետեւ երկիրը կառավարվում է միահեծան ձեւով` վերեւից, ու մի կուսակցություն վերցրել է ամբողջ իշխանությունը` բացարձակապես պատրաստ չլինելով, նույնիսկ կադր չունենալով ղեկավարելու համար, եւ փորձում է ամեն ինչ անել` իշխանության գլուխ մնալու համար»,- նշեց Վահան Հովհաննեսյանը` շարունակելով, որ Հայաստանում ոչ մի պաշտոնյա չի նշանակվում իր պաշտոնին, որպեսզի իրեն վստահված աշխատանքը կատարի ավելի լավ, քան իր նախորդը, կամ ընդհանրապես կատարի:

Նա հավելեց, որ ցանկացած նշանակում կատարվում է միայն մեկ տրամաբանությամբ` իրենց մարդուն նշանակեն պաշտոնի, որ հաջորդ ընտրություններում ապահովի իրենց վերարտադրվելը: Դրա համար, պարզաբանեց ՀՅԴ ներկայացուցիչը, քաղաքապետն էլ է ՀՀԿ-ական, թաղապետներն է են ՀՀԿ-ական, կամ իշխանությանը պատկանող, ու նրանց բոլորի խնդիրը ոչ թե Երեւանը բարգավաճ քաղաք դարձնելն է, այլ որպեսզի Երեւանից եկած քվեներով ՀՀԿ-ն` պառլամենտում, ՀՀԿ ներկայացուցիչը` նախագահական ընտրություններում անպայման հաղթեն:

«Իշխանությունը փոխելը պետք է սկսել հիմա` սկսելով Երեւանից, եւ Երեւանը կփոխի Հայաստանը, Երեւանում իշխանությւան փոփոխությունը բավական է, որ ամբողջ Հայաստանում դա հնարավոր լինի անել հանգիստ, առանց որեւէ բախումների, առանց որեւէ ջղագրգռությունների եւ մեր պետական ու ազգային շահերը չվտանգելով: Դրա համար միայն մեկ բան է պետք»,- ասաց ԱԺ ՀՅԴ-ական պատգամավորը ու շարունակեց, որ ճիշտ է Երեւանում իշխանությունը փոխել Դաշնակցությունով, որովհետեւ, շեշտեց Վ. Հովհաննեսյանը, ՀՅԴ թիմն ավելի գրագետ է, պատրաստված ու ավելի պրոֆեսիոնալ կարող է հարցերը լուծել: